కోరిక తీర్చాలని, నగ్నచిత్రాలు పంపాలని బెదిరింపులు
వాట్సాప్ లో నగ్నచిత్రాలు పంపిన ఉన్మాది
సైబర్‌ ఠాణాలో బాధితురాలి ఫిర్యాదు

హైదరాబాద్‌ : ఓ జిల్లా అధికారిణికి గుర్తు తెలియని వ్యక్తి ఫోన్‌ చేసి అసభ్యంగా మాట్లాడి వేధిస్తున్నాడు. తన కోరిక తీర్చాలని, వాట్సా్‌పలో నగ్నచిత్రాలు పంపాలని బెదిరిస్తున్నాడు. ఆమె పట్టించుకోకపోవడంతో తన నగ్నచిత్రాలు, వీడియోలను ఆమె వాట్సాప్‌ నంబర్‌కు పంపాడు. ఆ ఉన్మాది చేష్టలతో తీవ్ర మనస్తాపానికి గురైన ఆమె సైబర్‌ పోలీసులను ఆశ్రయించారు. ఆమె హైదరాబాద్‌ శివారులోని ఓ జిల్లాలో కీలకమైన విభాగంలో అధికారిణిగా పనిచేస్తున్నారు. రాచకొండ కమిషనరేట్‌ పరిధిలో ఆమె నివసిస్తున్నారు. గత ఏడాది ఆగస్టులో ఒక నంబర్‌ నుంచి ఆమె ఫోన్‌కు కాల్‌ వచ్చింది. గుర్తు తెలియని వ్యక్తి అసభ్యంగా మాట్లాడాడు. ప్రభుత్వ ఉద్యోగి కావడం, కీలక పదవిలో ఉండటంతో ఆమె ఠాణాలో ఫిర్యాదు చేసేందుకు జంకారు. కొద్ది రోజుల తర్వాత మూడు వేర్వేరు నంబర్ల నుంచి ఆ వ్యక్తి ఫోన్లు చేస్తూ వేధిస్తున్నాడు. అసభ్యకరమైన మెసేజ్‌లు పంపించాడు. నగ్నచిత్రాలు, వీడియోలు పంపించకపోతే ఇంకా వేధింపులకు గురిచేస్తానని బెదిరించాడు. తాను చెన్నైలో ఉంటానని, హైదరాబాద్‌కు వచ్చేందుకు ప్రయాణ ఖర్చులు రూ.2 వేలు పంపాలని బ్యాంక్‌ ఖాతా వివరాలను ఆమెకు మెసేజ్‌ పంపాడు. ఆ వ్యక్తి వేధింపులతో తీవ్ర మనస్తాపం చెందానని, తన కుటుంబ సభ్యులు మనోవేదనకు గురవుతున్నారని భర్తతో కలిసి ఆమె రాచకొండ సైబర్‌ ఠాణాలో ఇటీవల ఫిర్యాదు చేశారు. ఐపీసీ 354డీ, 506 ఐపీసీ సెక్షన్లతో పాటు ఐటీ చట్టంలోని 67, 67ఏ సెక్షన్ల ప్రకారం పోలీసులు కేసు నమోదు చేశారు.

Courtesy Andhrajyothi