మహమ్మారులు మానవజాతిపై విరుచుకుపడటం కొత్తేం కాదు. మానవుడికన్నా ముందే పుట్టిన సూక్ష్మజీవులు.. ఆది నుంచీ మహమ్మారులుగా మారి ప్రాణాలు హరిస్తున్నాయి. ముఖ్యంగా ఆధునిక మానవ చరిత్రను పరిశీలిస్తే ప్రతి శతాబ్దంలో ఓ మహమ్మారి ప్రపంచాన్ని గడగడలాడించింది. 21వ శతాబ్దం కరోనాతో మొదలైంది. 

ప్లేగు: మానవజాతి చరిత్రలో అతిపెద్ద విషాదాన్ని నింపిన మహమ్మారుల్లో ప్లేగు ఒకటి. క్రీ.శ 541లో తూర్పు రోమ్‌ సామ్రాజ్యంలో వెలుగుచూసింది. రోమ్‌తోపాటు చుట్టుపక్కల సామ్రాజ్యాలకు చెందిన దాదాపు 2.5 కోట్ల మందిని పొట్టనపెట్టుకున్నట్టు అంచనా. ఎలుకల ద్వారా వ్యాప్తి చెందే ఈ వ్యాధి ఇప్పటివరకు కోట్ల మందిని బలిగొన్నది. దీన్ని మొదట్లో ‘బ్లాక్‌ డెత్‌’ అని పిలిచేవారు. 14వ శతాబ్దం ప్రారంభంలో ప్లేగు వ్యాధి మరోసారి విజృంభించింది. ఆసియా, ఐరోపా, ఉత్తర ఆఫ్రికా దేశాలపై పంజా విసిరింది. ఐరోపాలో ప్రతి ముగ్గురిలో ఒకరు ప్లేగు బారిన పడి మరణించారంటే పరిస్థితి అర్థం చేసుకోవచ్చు. ఆ తర్వాత 18వ శతాబ్దంలో మరోసారి పడగవిప్పింది. ఊర్లకు ఊర్లను తుడిచిపెట్టింది. దాదాపు ఏడాదిపాటు కరాళ నృత్యం చేసింది. ప్లేగును నియంత్రించగలిగామే తప్ప ఇప్పటికీ నిర్మూలించలేదు. 2018లో ప్రపంచవ్యాప్తంగా 243 ప్లేగు కేసులు వెలుగుచూడగా, 41 మంది మరణించారు. ప్లేగు నివారణకు శుభ్రతే  శ్రీరామరక్ష.

కలరా: కలుషిత నీటి ద్వారా వ్యాపించే ఈ వ్యాధి గురించి 1642లో వచ్చిన ఓ యురోపియన్‌ నవలలో ప్రస్తావించారు. మన దేశంలోనూ చాలాసార్లు కలరా ప్రబలింది. అయితే.. 1817లో భారత్‌లోని గంగానదీ తీరం వెంబడి కలకత్తాలో మొదలైన ఈ వ్యాధి.. క్రమంగా మహమ్మారిగా మారింది. అక్కడి నుంచి వాణిజ్య మార్గాల ద్వారా రష్యాకు, తర్వాత యూరప్‌, అమెరికా.. ఇలా ప్రపంచాన్ని చుట్టేసింది. ప్రపంచం మొత్తాన్ని చిగురుటాకులా వణికించింది. కోట్ల మందిని బలితీసుకున్నది. 1824 వరకు కలరా వణికించింది. ఆ తర్వాత ఏటా కలరా కేసులు నమోదవుతున్నా.. ఒకటి రెండు దశాబ్దాలకు ఒకసారి మాత్రం పడగవిప్పుతున్నది. గత 200 ఏండ్లలో ఏడుసార్లు కలరా పంజా విసిరింది. ప్రతిసారి కోట్ల మందిని బలి తీసుకుంది. ఇప్పటికీ ఏటా సగటున 13లక్షల నుంచి 40 లక్షల మంది కలరా బారిన పడుతున్నారని డబ్ల్యూహెచ్‌వో చెప్తున్నది. ఇందులో 21వేల నుంచి 1.40 లక్షల మంది మరణిస్తున్నట్టు అంచనా వేసింది. పారిశుద్ధ్యాన్ని పెంపొందించడం ద్వారా కలరాను నియంత్రించగలిగారు.

స్పానిష్‌ ఫ్లూ :వైరస్‌తో వ్యాప్తి చెందే భయంకరమైన వ్యాధుల్లో ఇన్‌ఫ్లూయెంజా ఒకటి. 1918-1920 మధ్య ప్రపంచవ్యాప్తంగా దాదాపు 50 కోట్ల మందికి సోకిందని అంచనా. అంటే ప్రపంచ జనాభాలో 27 శాతం. ఇందులో ఐదు కోట్ల మంది వరకు మరణించి ఉంటారని అంచనా. దీంతో మానవజాతి చరిత్రలోనే అత్యంత నష్టాన్ని మిగిల్చిన మహమ్మారిగా ఇన్‌ఫ్లూయెంజా నిలిచిపోయింది. ఈ వ్యాధికి సంబంధించిన వార్తలపై అప్పట్లో నిషేధం ఉండేది. అయితే స్పెయిన్‌లో మాత్రం విచ్చలవిడిగా వార్తలు వచ్చేవి. దీంతో ఈ వైరస్‌ స్పెయిన్‌లోనే పుట్టిందనే అపోహలు తలెత్తి.. స్పానిష్‌ ఫ్లూగా మారింది.

మశూచి :మశూచి వ్యాధి దాదాపు 15వేల ఏండ్ల కిందట వెలుగుచూసినట్టు అంచనా. ఆఫ్రికాలో మొదలై ప్రపంచం మొత్తాన్ని చుట్టివచ్చిందని చెప్తుంటారు. ఇప్పటివరకు ఈ వ్యాధి వల్ల దాదాపు 50 కోట్ల మంది మరణించినట్టు అంచనా. ఇప్పటికీ ప్రపంచవ్యాప్తంగా ఎక్కడో ఒకచోట ఈ వ్యాధి విజృంభిస్తూనే ఉన్నది. టీకా ద్వారా ఈ వ్యాధిని నియంత్రించారు.

ఎయిడ్స్‌: 1981లో ఆఫ్రికాలో మొదలై ఇప్పటికీ ప్రపంచాన్ని భయపెడుతున్న మహమ్మారి ఎయిడ్స్‌. డబ్ల్యూహెచ్‌వో లెక్కల ప్రకారం గత 40 ఏండ్లలో దాదాపు 3.2 కోట్ల మంది ప్రాణాలను బలి తీసుకున్నది. 2018 చివరినాటికి ప్రపంచవ్యాప్తంగా దాదాపు 3.8 కోట్ల మంది ఎయిడ్స్‌ వ్యాధిగ్రస్థులు ఉన్నట్టు అంచనా. ఇందులో మూడొంతుల మంది (2.5 కోట్లు) ఆఫ్రికాలోనే ఉన్నారు. 2018లో ప్రపంచవ్యాప్తంగా 77వేల మంది ఎయిడ్స్‌తో మరణించగా, 17 లక్షల కొత్త కేసులు నమోదయ్యాయి. ఎయిడ్స్‌కు ఇప్పటికీ సరైన చికిత్స లేదు.

Courtesy Namasthe Telangana