మారుతీరావు కుమార్తె అమృతవర్షిణి ఎట్టకేలకు తన తల్లి గరిజను కలిసింది. మారుతీరావు మరణించిన వారం రోజుల తర్వాత ఈ కీలక పరిణామం చోటు చేసుకుంది. శనివారం (మార్చి 14) సాయంత్రం పోలీసుల బందోబస్తు మధ్య మిర్యాలగూడలోని మారుతీరావు నివాసంలో అమృత తన తల్లిని కలిసి మాట్లాడింది. ఈ సందర్భంగా అక్కడ ఉద్వేగపూర్వక వాతావరణం నెలకొంది. మారుతీరావు ఆత్మహత్య తర్వాత మొదటిసారిగా కలుసుకున్న తల్లీకూతుళ్లు తీవ్రంగా రోదించారు. అమృత వస్తున్న విషయం తెలిసి అప్పటికే పలువురు బంధువులు అక్కడికి చేరుకున్నారు. మిర్యాలగూడలో పెరుమాళ్ల ప్రణయ్ హత్య తెలుగు రాష్ట్రాల్లో సంచలనం సృష్టించగా.. మారుతీరావు మరణం మరో సంచలనానికి కారణమైంది. తాజాగా అమృత తన తల్లిని కలిసిన అంశం తెలుగు రాష్ట్రాల్లో హాట్ టాపిక్‌గా మారింది.

పోలీసుల సాయంతో తల్లి నివాసానికి..

పోలీసుల పర్యవేక్షణ మధ్య అమృత తన బాబాయ్ శ్రవణ్‌ను కూడా కలిసింది. ఆయనతో కాసేపు మాట్లాడింది. అనంతరం తన తల్లితో ఏకాంతంగా మాట్లాడాలని కోరగా.. బాబాయ్ శ్రవణ్‌తో పాటు బంధువులను పోలీసులు పై అంతస్తులోకి పంపించారు. అమృత తన తల్లి గిరిజతో సుమారు 20 నిమిషాలు ఏకాంతంగా మాట్లాడింది. ఆ వివరాలు మీడియాకు వెల్లడించడానికి బంధువులు నిరాకరించారు.

తల్లితో ఏకాంతంగా ఏం మాట్లాడి ఉంటుంది?

గత ఆదివారం మారుతీరావు అంత్యక్రియల సందర్భంగా.. తన తండ్రి మృతదేహాన్ని చూసేందుకు వచ్చిన అమృతను బంధువులు అడ్డుకున్న విషయం తెలిసిందే. దీంతో ఆమె తన తల్లిని కలవలేకపోయింది. మొత్తంమీద తండ్రి మరణించిన ఏడు రోజుల తర్వాత పోలీసుల సాయంతో తన తల్లిని కలిసి మాట్లాడింది. అమృత తన తల్లిని కలిసిన వార్త మిర్యాలగూడలో చర్చనీయాంశంగా మారింది. మారుతీరావు చివరి కోరిగా నెరవేరే అవకాశం ఉండొచ్చని పట్టణ ప్రజలు, బంధువులు భావిస్తున్నారు. ప్రధానంగా అమృత తన తల్లితో ఏకాంతంగా ఏం మాట్లాడి ఉంటుందని ఆసక్తికరంగా చర్చించుకుంటున్నారు.

మరణానికి ముందు తీవ్ర మనోవేదన!

మిర్యాలగూడలో సంచలనం సృష్టించిన పెరుమాళ్ల ప్రణయ్ హత్య కేసులో ప్రధాన నిందితుడిగా ఉన్న మారుతీరావు మార్చి 7న అర్ధరాత్రి తర్వాత ఖైరతాబాద్‌లోని ఆర్యవైశ్య భవన్‌లో అనుమానాస్పద రీతిలో మృతి చెందిన విషయం తెలిసిందే. మరుసటి రోజు ఉదయం డ్రైవర్ రాజేష్ ఆర్యవైశ్య భవన్‌లో మారుతీ రావు బసచేసిన గది తలుపులు ఎంత బాదినా తీయకపోవడంతో అనుమానంతో పోలీసులకు సమాచారం ఇచ్చాడు. దీంతో అక్కడికి వచ్చిన పోలీసులు.. భవనంలోని ఓ గదిలో మారుతీరావు మంచంపై విగతజీవిగా పడి ఉన్నట్లు గుర్తించారు. మరణించడానికి ముందు మారుతీరావు తన భార్య గిరిజ, కుమార్తె అమృత విషయంతో తీవ్ర మనోవేదనకు గురైనట్లు ఆయన రాసిన సూసైడ్ నోట్ ద్వారా అర్థమవుతోంది.

అమృత తన తల్లి వద్దకు వచ్చేస్తుందా?

పోలీసులు మారుతీరావుది ప్రాథమికంగా ఆత్మహత్యగా నిర్ధారించారు. ప్రణయ్‌ హత్య తర్వాత చోటు చేసుకున్న పరిణామాలు, కేసుల ఒత్తిడి కారణంగానే ఆయన ఆత్మహత్యకు పాల్పడి ఉంటాడని అనుమానిస్తున్నారు. ఘటనా స్థలంలో పోలీసులు ఓ లేఖను స్వాధీనం చేసుకున్నారు. ఆ లేఖలో ‘గిరిజా క్షమించు, అమృతా అమ్మదగ్గరికి రా’ అని రాసి ఉంది. మారుతీరావు కోరిక మేరకు అమృత తన తల్లి వద్దకు వచ్చేస్తుందా అనేది ఇప్పుడు చర్చనీయాంశంగా మారింది.

Courtesy Samayam